Buriram ​ប្រកាស​​ដល់​​អ្នក​​គាំទ្រ​​ចូលរួមឲ្យ​ច្រើន​ ខណៈ​ PNN រៀប​ចំ​ផ្សាយ​​​កាន់​តែ​ពិសេស

ក្លឹប Buriram United ​នឹង​ប្រកួត​មិត្តភាព​ជាមួយ Cambodian All Stars ​នៅ​ថ្ងៃ​ស្អែក​វេលា​ម៉ោង​៦:៣០​នាទី​ល្ងាច​នៅ​ពហុ​កីឡដ្ឋាន​ជាតិ។ ក្រុម​ថៃ​មួយ​នេះ​នឹង​មក​ដល់​កម្ពុជា​នៅ​ល្ងាច​ម៉ោង​៤:២៥​នាទី ​ថ្ងៃ​សុក្រ​នេះ ដោយ​ពួកគេ​បាន​ហ្វឹកហាត់​យ៉ាង​គ្រប់​គ្រាន់​នៅ​ទឹក​ដី​ថៃ មុន​ឡើង​យន្តហោះ​មក​កម្ពុជា។

មុន​ការ​មក​ដល់​នោះ​ដែរ Facebook ​ផ្លូវ​ការ​របស់ Buriram United ​បាន​សរសេរ​ប្រាប់​ដល់​អ្នក​គាំទ្រ​ទាំង​អស់​ថា កុំ​ភ្លេច​មក​ចូល​រួម​ទស្សនា​ការ​ប្រកួត​របស់​ពួកគេ​នៅ​ទឹក​ដី​ខ្មែរ ​ដោយ​សំបុត្រ​មាន​លក់​ត្រឹម​តែ​២​ដុល្លារ និង​១​ដុល្លារ​ប៉ុណ្ណោះ ដើម្បី​យក​ប្រាក់​ជួយ​ដល់​មន្ទីរពេទ្យ​គន្ធបុប្ផា។ ទន្ទឹម​នឹង​នេះ​ដែរ Buriram ​ក៏​បាន​បញ្ជាក់​ទៀត​ថា ការ​ប្រកួត​នេះ​ក៏​មាន​ការ​សម្ដែង​ពី​តារា​ចម្រៀង ខេម, មាស សុខសោភា ​និង​ឆាយ វិរយុទ្ធ​ទៀត​ផង។ ​ងាក​មក​ខាង​អ្នក​រៀប​ចំ​កម្មវិធី សហព័ន្ធ​បាល់ទាត់​កម្ពុជា​សហការ​ជាមួយ​ទូរទស្សន៍ PNN ​កំពុង​តែ​ញាប់​ដៃ​ញាប់​ជើង​ជា​ខ្លាំង ដើម្បី​ធ្វើ​ឱ្យ​ការ​ប្រកួត​មួយ​នេះ​មាន​លក្ខណៈ​ស្ដង់ដា ត្រូវ​ចិត្ត​អ្នក​គាំទ្រ​ទាំង​អស់។ ដោយ​កាល​ពី​ព្រឹក​មិញ​នេះ គេ​ឃើញ​មាន​ការ​តំឡើង​ផ្ទាំង LED ​យ៉ាង​ធំ​មួយ​ទៀត ដើម្បី​ទុក​ចាក់​ផ្សាយ​ការ​ប្រកួត​នៅ​ក្នុង​កីឡដ្ឋាន​ជាតិ​តែ​ម្ដង។ ហើយ​កាល​ពី​យប់​មិញ​នេះ​ដែរ សហព័ន្ធ​បាល់ទាត់​កម្ពុជា ក៏​បាន​សាក​ភ្លើង​ពណ៌​រួចជា​ស្រេច​ផង​ដែរ។