ពេលនេះម៉ោងនេះ កូរ៉េខាងជើងបានផ្គើននឹងការព្រមានរបស់អន្តរជាតិហើយ ដោយរដ្ឋាភិបាលទីក្រុងព្យុងយ៉ាងបានសម្រេចបាញ់មីស៊ីលរយៈចម្ងាយឆ្ងាយចេញបាត់ហើយ នេះបើយោងតាមរដ្ឋាភិបាលរបស់កូរ៉េខាងត្បូង ហើយវានឹងត្រូវបានគេចាត់ទុកជាការញុះញង់ចំពោះសហរដ្ឋអាមេរិក អមទាំងសម្ព័ន្ធមិត្តរបស់ប្រទេសនេះដែរ ។
ក្រុមប្រឹក្សាសន្តិសុខជាតិកូរ៉េខាងត្បូងបានកោះហៅប្រជុំជាបន្ទាន់មួយ ជុំវិញការបាញ់មីស៊ីលរបស់កូរ៉េខាងជើងនេះ ដោយគេអះអាងថា វាបានបាញ់ចេញតាំងពីម៉ោង៩:៣០នាទីព្រឹក ថ្ងៃអាទិត្យ ទី៧នេះមកម្ល៉េះ ហើយក្នុងនោះសូម្បីតែក្រុមប្រឹក្សាសន្តិសុខរបស់អង្គការសហប្រជាជាតិ ក៏បានប្រកាសបើកកិច្ចប្រជុំបន្ទាន់មួយដែរ ។
បើមើលតាមគន្លងរបស់មីស៊ីលនេះ វាទំនងជាមិនបង្កហានិភ័យដល់អាមេរិក និងសម្ព័ន្ធមិត្តរបស់អាមេរិកទេ ប៉ុន្តែអាមេរិកនៅតែថ្កោលទោសចំពោះរឿងនេះ ហើយហៅករណីនេះថា ជាការបង្ករឿងមួយដែលមិនអាចមិនដោះស្រាយបាន ។
មកទល់ពេលនេះ ទាំងអាមេរិក ជប៉ុន និងកូរ៉េខាងត្បូងសុទ្ធតែតាមដានមីស៊ីលនេះជាខ្លាំង ព្រោះអ្វីដែលគេបារម្ភនោះគឺ បំណែកដែលខ្ទាតចេញមីស៊ីលអាចនឹងធ្លាក់ត្រូវកោះ Okinawa របស់ជប៉ុន និងកោះ Jeju របស់កូរ៉េខាងត្បូង ។
ទាក់ទងនឹងករណីនេះ សូម្បីតែចិនដែលជាសម្ព័ន្ធមិត្តរបស់កូរ៉េខាងជើងក៏ថ្លែងថ្កោលទោសដែរ ប៉ុន្តែកូរ៉េខាងជើងហាក់មិនអើពើអ្វីសូម្បីតែបន្តិច ហើយគេអះអាងខ្លួនគេថា វាគ្រាន់តែជាមីស៊ីលផ្កាយរណបបាញ់ទៅលើអវកាសប៉ុណ្ណោះ តែអ្វីទាំងនេះខុសពីអ្វីដែលពិភពលោកគិត ពោលគឺគេគិតថា វាជាការសាកល្បងមីស៊ីលរយៈចម្ងាយឆ្ងាយពាំក្បាលនុយក្លេអ៊ែរ ។
គួរបញ្ជាក់ថា មីស៊ីលដែលបាញ់លើកទី៦នេះ ទំនងជាមីស៊ីលរយៈចម្ងាយឆ្ងាយ Taepodong ដែលជាមីស៊ីលអន្តរទ្វីបមួយប្រភេទ ហើយមានដែនប្រសិទ្ធភាពដល់ទៅ៩០០០គីឡូម៉ែត្រជុំវិញមីស៊ីល ដែលអាចគ្របដណ្ដប់ដល់អូស្ត្រាលី ភាគច្រើននៃអឺរ៉ុបខាងលិច និងភាគខាងលិចនៃច្រាំងសមុទ្រអាមេរិក ៕
0 comments:
Post a Comment