ប្រុសស្អាត«ប្រជាប្រិយ»នាងខ្ញុំមានបញ្ហាផ្ទាល់ខ្លួនដែលចង់សុំឱ្យប្រុសស្អាតជួយដោះស្រាយ ។ នាងខ្ញុំសូមលាក់ឈ្មោះ រស់នៅក្រុងភ្នំពេញមានជីវភាពសមរម្យ អាយុទើបតែ ២០ ឆ្នាំ ប៉ុន្តែជួបរឿងអភ័ព្វដោយបានធ្លាក់ខ្លួនជាស្រីមេម៉ាយទាំងវ័យក្មេង ហើយគេទាមទារឱ្យចេញសងថ្លៃបណ្ណាការគេទៀត បើខ្ញុំមិនព្រមវិលរួមរស់ជាមួយគេវិញទេនោះ ។ដំណើររឿងរបស់ខ្ញុំគឺមានបុរសម្នាក់បានតាមស្រឡាញ់រូបខ្ញុំទាំងដឹងថា ខ្ញុំកំពុងស្ថិតនៅក្នុងវ័យ សិក្សាមិនទាន់មានចិត្តគំនិតចង់បានគូអនាគតអ្វីទេ ប៉ុន្តែបុរសនោះចេះតែព្យាយាមតាមសួរចិត្ត និង មិនតែប៉ុណ្ណោះគេបានឱ្យឪពុកម្តាយគេចូលស្តីដណ្តឹងដល់ឪពុកម្តាយខ្ញុំតាមប្រពៃណីទំនៀមទម្លាប់ខ្មែរ ធ្វើឱ្យពួកគាត់មានការទន់ចិត្តយល់ព្រមលើកកូនស្រីឱ្យទៅគេដោយទារថ្លៃបណ្ណាការ ៨ ពាន់ដុល្លារ ។
ដោយសារខ្ញុំជាកូនស្រីដែលស្តាប់ដំបូន្មានឪពុកម្តាយ ក៏យល់ព្រមតាមសុខចិត្តឈប់រៀនហើយចូលរោងការ ប៉ុន្តែក្រោយពីខ្ញុំរៀបការបានមិនដល់មួយខែផង គេបានប្រើអំណាចជាស្វាមីគាបសង្កត់ទាំងផ្លូវកាយផ្លូវចិត្ត យប់ឡើងទៅផឹកស៊ីស្រីញីអូនបងក្រៅផ្ទះ ពេលណាសួរនាំគាត់តែងគំហកគំរាមកំហែងមិនឱ្យខ្ញុំនិយាយអ្វីបានសោះឡើយ ។ អាកប្បកិរិយា និង សកម្មភាពរបស់គាត់ពីមួយថ្ងៃទៅមួយថ្ងៃកាន់តែធ្វើឱ្យខ្ញុំឆ្អែតចិត្តតឹងទ្រូង ពិសេសមានអារម្មណ៍មិនចូលចិត្តថែមទាំងស្អប់គាត់ជាខ្លាំងរហូតលែងចង់ឃើញលែងចង់ជួបមុខគាត់តទៅទៀត ។
ដោយទ្រាំអត់ធ្មត់បន្តទៀតលែងបានទើបខ្ញុំសម្រេចចិត្ត ចាកចេញពីផ្ទះដោយមិនបានប្រាប់គាត់ទៅសំងំនៅផ្ទះមិត្តភក្តិរបស់ខ្ញុំដើម្បីឱ្យរសាយចិត្ត ។ មិនត្រឹមតែមិនយល់ចិត្តខ្ញុំ ឬ លួងលោមចិត្តខ្ញុំទេគាត់បែរជាចងកំហឹងជាមួយខ្ញុំ ហើយចោទប្រកាន់ខ្ញុំថាចុះចោលផ្ទះទៅតាមប្រុសថ្មី បើខ្ញុំមិនព្រមវិលត្រឡប់ចូលផ្ទះ វិញទេនោះគាត់នឹងប្តឹងឱ្យសងថ្លៃបណ្ណាការទាំងអស់ឱ្យគាត់វិញ ។ ត្រង់ចំណុចនេះខ្ញុំសូមឱ្យ ប្រុសស្អាត«ប្រជាប្រិយ»ជួយបង្ហាញផ្លូវខ្ញុំផង ព្រោះគាត់ហាសម្តីឡើងទាមទារសំណងថ្លៃបណ្ណាការដោយពុំបានគិតដល់ការខូចខាតទាំងផ្លូវកាយ និង ផ្លូវចិត្តខ្ញុំបន្តិចណាសោះឡើយ ហេតុនេះខ្ញុំចង់សួរទៅគាត់វិញថាបើគាត់ចង់បានថ្លៃបណ្ណាការវិញចុះតើក្រមុំខ្ញុំអ្នកណាជាអ្នកចេញសង ?
ពីប្រុសស្អាត«ប្រជាប្រិយ»
នាងគួរឱ្យអាណិតណាស់បើស្តាប់តាមការរៀបរាប់របស់នាងនោះគឺនាងមិនទាន់ចង់បានស្វាមី ទេព្រោះកំពុងស្ថិតក្នុងការសិក្សា តែដើម្បីកេរ្តិ៍ឈ្មោះ កិត្តិយសឪពុកម្តាយស្តាប់ដំបូន្មានគាត់ទើបនាងយល់ព្រមរៀបការ ។ ហេតុនេះនាងជានារីម្នាក់ដែលគោរពតាមប្រពៃណីទំនៀមទម្លាប់ខ្មែរ និង ជាកូនស្រីល្អម្នាក់ ប៉ុន្តែបែរជាពេលបានស្វាមីមិនសមតាមបំណងប៉ះចំបុរសដែលចូលចិត្តដើរលេងសើចសប្បាយ ក្រៅផ្ទះ និង ប្រើហិង្សាលើនាងទើបធ្វើឱ្យនាងមិនអាចទ្រាំរួមរស់ជាមួយតទៅទៀតបាន ។
ត្រង់ចំណុចនេះខ្ញុំមិនបន្ទោសនាងទេ គឺគ្រាន់តែចង់ឱ្យនាងងាក មកធ្វើការត្រិះរិះពិចារណាឱ្យបានវែងឆ្ងាយឡើងវិញថា ហេតុអ្វីមុនឈានជើងចាកចេញពីផ្ទះនាងមិនព្រមផ្តល់ដំណឹងឬប្រាប់ឱ្យស្វាមីបានដឹងពីអំពើ និង សកម្មភាពមិនល្អរបស់ស្វាមីដែលធ្វើឱ្យនាងមិនអាចទ្រាំទ្ររស់នៅជាមួយគ្នាបន្តទៀត ? ជាការពិតហើយ ព្រោះតែនាងខឹងនឹងចរិតមិនល្អរបស់ស្វាមីទើបមិនចង់និយាយ ឬ ចង់ជ្រលក់ជាមួយស្វាមីហើយនាង តែងគេចមិនចង់ជួបមុខស្វាមី ប៉ុន្តែនៅពេលដែលនាងធ្វើដូច្នេះអាចធ្វើឱ្យស្វាមីមានអារម្មណ៍យល់ខុស កើតចិត្តប្រចណ្ឌខុសរឿង គិតថានាងអត់មានចិត្តស្រឡាញ់រូបគេជាស្វាមីទេ ពោលគឺគេបានរូបកាយនាងពិតមែន រីឯចិត្តគំនិតបេះដូងរបស់នាងអាចមានអ្នកផ្សេងទៅវិញ ដែលជាកត្តាមួយកាន់តែធ្វើឱ្យស្វាមីមានការក្តៅក្រហាយក្នុងចិត្តធ្វើសកម្មភាពផ្គើនចិត្តនាង។
ពេលដែលនាងចាកចេញពីផ្ទះដោយមិនបានប្រាប់ទៀតនោះរឹតតែស្របទៅតាមការសង្ស័យរបស់ស្វាមី ហើយដែលអាចឱ្យគេគិត ថានាងទៅតាមបុរសដែលនាងស្រឡាញ់មែនហើយ បើទោះនាងទៅស្នាក់នៅផ្ទះមិត្តភក្តិពិតមែនក៏គេមិនជឿដែរ ។ចាននៅក្នុងរាវលែងអ្វីនឹងមិនមានរណ្តំ យ៉ាងណាមិញជីវិតគូស្វាមីភរិយាតែងប៉ះទង្គិចសម្តីគ្នាខ្លះជាមិនខាន ហេតុដូច្នេះបើនាងដាក់ចិត្តថាព្រមធ្វើជាភរិយាពេញច្បាប់របស់គេហើយនោះគួរតែនាង ចេះរកវិធីដោះស្រាយបញ្ហាភ្លាមៗជាមួយស្វាមីដោយ ចេះរកពេលវេលាសមស្របដើម្បីនិយាយគ្នា មិនមែនពេលឃើញមុខគេភ្លាមមិនទាន់បាត់ហត់ផងក៏លើករឿង ឬ បញ្ហាផ្សេងៗមកនិយាយប្រាវៗនោះក៏មិនល្អដែរ ។
យ៉ាងណាក៏ខ្ញុំជឿថានាងជាអ្នករៀន សូត្រចេះដឹងពិតជាមិនធ្វើបែបនេះឡើយ ។ ឥឡូវ យើងងាកមកនិយាយរឿងស្វាមីទារបណ្ណាការ ហើយនាងសួរថាបើដូច្នេះ«ក្រមុំខ្ញុំអ្នកណាសង ?» ។ បើតាមស្តាប់ការរៀបរាប់របស់នាងគឺស្វាមីរបស់ នាងចង់ឱ្យនាងវិលត្រឡប់ចូលផ្ទះដូចដើមវិញនោះគេក៏មិនទាមទារអ្វីដែរ ។ តើនាងគិតធ្វើបែបណា ? ត្រូវទៅរស់នៅជួបជុំគ្នារៀបចំដំណើរជីវិតគ្រួសារឱ្យ ល្អប្រសើរឡើងវិញ ឬ សម្រេចចិត្តចាកចេញពីរូបគេ ?
ខ្ញុំគ្រាន់តែលើកជាពាក្យស្លោកឱ្យនាងត្រិះរិះទៅចុះថា«យើងមិនអាចកែប្រែអតីតកាលបានទេ តែយើងអាចកែប្រែអនាគតបានដោយចាប់ផ្តើមពីបច្ចុប្បន្ននេះតទៅ ឬមួយសុខចិត្តចប់ដោយការឈឺចាប់ប្រសើរជាងទ្រាំនៅឈឺចាប់ដោយមិនមាន ថ្ងៃបញ្ចប់នោះ ។ ខ្ញុំគ្រាន់តែផ្តាំជាចុងក្រោយថា ដោយសារនាងរៀបការតាមប្រពៃណីជាស្វាមីភរិយាស្របច្បាប់ ហេតុនេះបើចង់ចែកផ្លូវគ្នាមិនមែនបញ្ចប់ត្រឹមតែគ្នាឯងពីរនាក់នោះបានទេ ចាំបាច់ទាល់តែឆ្លងកាត់ការកាត់ក្តីពីតុលាការ ហើយរឿងទារថ្លៃបណ្ណាការ ឬ ទារសងក្រមុំក៏ជារឿងដែលត្រូវទៅដោះស្រាយគ្នាក្នុងតុលាការដែរ ៕
0 comments:
Post a Comment