មនុស្សភាគច្រើន តែងប្រឈមនឹងបញ្ហាតានតឹងក្រោយពេល ធ្វើការជាច្រើនម៉ោង ក្នុងមួយថ្ងៃៗ។ បើតាមការស្រាវជ្រាវបង្ហាញថា បញ្ហាតានតឹងខ្លាំងពេកអាចបណ្តាលឲ្យមនុស្សចុះខ្សោយប្រព័ន្ធចងចាំ និងធ្វើឲ្យពួកគេឆាប់បែកអារម្មណ៍ (មិនអាចធ្វើការងារអ្វីបានល្អ) ដូច្នេះហើយបានជាមនុស្សភាគច្រើន ភ្លេចនេះភ្លេចនោះជាញឹកញាប់ និងមិនអាចធ្វើការងារអ្វីមួយបានល្អ។
យ៉ាងណាក៏ដោយ មានវិធីងាយៗមួយចំនួនអាចពង្រឹងការផ្ដោតអារម្មណ៍ ឬការចងចាំឲ្យប្រសើរជាងមុន បើទោះបីជាប្រឈមនឹងការងារស្មុគស្មាញ ឬ តានតឹងយ៉ាងណាក្តី។ ខាងក្រោមនេះ មានវិធី ៣យ៉ាងដែលយើងអាចសាកល្បង ហើយវាមិនចំណាយច្រើននោះទេ៖
១) ការចំណាយពេលវេលាជាមួយនឹងធម្មជាតិ ពង្រឹងការចងចាំ
សាកលវិទ្យាល័យ Michigan របស់សហរដ្ឋអាមេរិក បានធ្វើការស្រាវជ្រាវ ដោយចែកមនុស្សជាពីរក្រុមដែលមានការចង់ចាំប្រហាក់ប្រហែលគ្នា។ ក្រុមទីមួយ ធ្វើដំណើរឆ្លងកាត់តំបន់ធម្មជាតិ និង មួយក្រុមទៀតធ្វើដំណើរឆ្លងកាត់តាមផ្លូវធម្មតា។ យោងតាមការស្រាវជ្រាវនេះបង្ហាញថា ក្រុមមនុស្សដែលបានធ្វើដំណើរឆ្លងកាត់តាមតំបន់ធម្មជាតិជាប្រចាំនោះ ការចងចាំមានការកើនឡើងរហូតដល់ ២០ ភាគរយ។ ចំណែកក្រុមទី២ ដែលដើរឆ្លងផ្លូវទីក្រុងធម្មតានោះ មិនមានអ្វីប្រសើរទេ។
២) ការរស់នៅក្នុងមជ្ឈដ្ឋានធម្មជាតិអាចពង្រឹងថាមពលខួរក្បាល
តើអ្នកធ្លាប់មានអារម្មណ៍ថា ខួរក្បាលរបស់អ្នកចុះអន់ខ្សោយដែរឬទេ? ដើម្បីអាចឲ្យខួរក្បាលរបស់យើង រក្សានូវថាមពលក្នុងការគិត និង ពង្រឹងវាឲ្យកាន់តែប្រសើរជាងមុននោះ អ្នកវិទ្យាសាស្ត្របានណែនាំឲ្យជ្រើសរើសការរស់នៅក្នុងមជ្ឈដ្ឋានធម្មជាតិ ដូចជា ទម្លាប់មើលសម្រស់ធម្មជាតិពីតាមបង្អួចជាដើម។
ការស្រាវជ្រាវបង្ហាញទៀតថា សម្រស់ធម្មជាតិពិតជាមានសារៈសំខាន់ខ្លាំងណាស់ ក្នុងការរក្សាភាពស្រស់ស្រាយរបស់មនុស្ស ហើយវាពិតជាជួយពង្រឹងដល់ថាមពលនៃការគិតឲ្យកាន់តែប្រសើរ។
៣) ទម្លាប់ដើរកម្សាន្តខាងក្រៅអាចពង្រឹងការផ្ចង់អារម្មណ៍របស់មនុស្ស
បើតាមការស្រាវជ្រាវថា មនុស្សដែលមានភាពស្មុគស្មាញជាមួយនឹងការងារ ហើយអាចឆ្លៀតពេលដើរកម្សាន្តខាងក្រៅខ្លះ គឺប្រសើរជាង មនុស្សដែលមានភាពស្មុគស្មាញជាមួយនឹងការងារហើយសំរាកនៅផ្ទះ។ ការទុកពេលខ្លះ ដើម្បីដើរកម្សាន្តខាងក្រៅ នឹងជួយឲ្យភាពតានតឹងរបស់មនុស្សមានការធូរស្បើយ ហើយអាចឲ្យគេរក្សាការផ្ចង់អារម្មណ៍លើការងារឡើងវិញ ក្រោយពីប្រឈមភាពស្មុគស្មាញ៕
ប្រភព៖ Thebnews
0 comments:
Post a Comment