ស្ត្រីគ្រប់រូបចាំបាច់ណាស់ត្រូវតែដឹងពីវិធីថែសម្រស់ឱ្យបានច្រើនយ៉ាង ដើម្បីសម្របទៅតាមបម្រែបម្រួលវ័យរបស់ខ្លួន ។ ខាងក្រោមនេះ គឺជា គន្លឹះសង្ខេបមួយចំនួនជាទុនសម្រាប់ស្ត្រីក្នុងការថែទាំសម្ផស្សឱ្យនៅផូរផង់ និងមិនងាយចាស់តាមអាយុ ។
១). កុំភ្លេចលាងមុខឱ្យស្អាតមុននឹងចូលគេង ដើម្បីសម្អាតរន្ធញើស និងមិនបង្កជាបុព្វហេតុនៃបញ្ហាស្បែកនានា ។
២). ជារៀងរាល់ថ្ងៃត្រូវមានទម្លាប់ លាងមុខ ប្រើថូន័រ និងម័សឈឺរ៉ាយសឺ ២ ដងក្នុងមួយថ្ងៃ (ព្រឹកម្តង ល្ងាចម្តង) ។
៣). កុំភ្លេចទុកហ្វូមគ្រើម គ្រីម និងម៉ាសមុខក្នុងទូរទឹកកកមុននឹងចូលគេង ។
៤). ប្រសិនបើស្បែកមុខមានពណ៌សម្បុរមិនស្មើសាច់ គួរប្រើទឹកត្រសក់លាយជាមួយទឹកក្រូចឆ្មារមកជូតត្រង់បរិវេណឡើងស្នាមខ្មៅៗ ទុកចោលប្រមាណ ២០នាទី មុននឹងលាងមុខចេញ ។
៥). កម្ចាត់បញ្ហារង្វង់ភ្នែកខ្មៅ ដោយបិតចំណិតប៉េងប៉ោះលើរង្វង់ភ្នែកជារៀងរាល់ព្រឹក ។
៦). ប្រើទឹកដំឡូងបារាំងជាឱសថជំនួយឱ្យស្បែកភ្លឺថ្លា ដោយលាបទឹកដំឡូងបារាំងលើស្បែក រួចទុកចោល៣០នាទី ។
៧). ជួបជាមួយអ្នកជំនាញស្បែកយ៉ាងតិចណាស់ ១ ដងក្នុងមួយខែ ។
៨). កុំចាកចេញពីផ្ទះដោយមិនបានលាបឡេការពារកម្តៅថ្ងៃ ។
៩). កុំប្រើសាប៊ូដុំលាងមុខប្រភេទកម្ចាត់បាក់តេរី តែប្រើហ្វូមលាងមុខ ឬ ហ្វូមប្រភេទកម្ចាត់ខ្លាញ់ជំនួសវិញ ព្រោះសាប៊ូដុំអាចធ្វើឱ្យស្បែកស្ងួត ។
១០). លាយម្សៅស្រូវអូតជាមួយទឹកក្តៅឧណ្ហសម្រាប់លាងលើរាងកាយ ឬមុខ ទុកចោល ២០នាទី រួចសឹមលាងចេញដោយប្រើសាប៊ូស្រាល ។ វិធីនេះ គឺដើម្បី ជួយឱ្យស្បែកម៉ដ្ឋរលោង និងតឹងណែន ។
១១). កក់សក់ដោយប្រើទឹកក្តៅឧណ្ហៗ ឬទឹកត្រជាក់ ។
១២). គួរលាបគ្រីមផ្តល់សំណើមដល់ស្បែកបន្ទាប់ពីងូតទឹករួចភ្លាម ទើបទទួលបានប្រសិទ្ធភាពខ្ពស់ ។
១៣). កិនស្ត្រប៊ឺរីសម្រាប់ធ្វើឱ្យធ្មេញស ។
១៤). គួរខាត់ស្បែកមុខ ១ ទៅ ២ដងក្នុងមួយសប្តាហ៍ ដើម្បីជម្រុះចោលកោសិកាចាស់ៗ និងថែរក្សាស្បែកឱ្យភ្លឺថ្លាឡើងវិញ។
១៥). ទទួលទានអាហារប្រភេទបន្លែផ្លែឈើចម្រុះពណ៌ ដើម្បីកម្ចាត់ជាតិពុលចេញពីរាងកាយ ។
១៦). ប្រើម្សៅរមៀតលាយជាមួយម្សៅសណ្តែក(besan) និងទឹកដោះគោជូរ សម្រាប់លាប ឬ ខាត់លើស្បែកឱ្យស្បែកភ្លឺថ្លាសាច់ចាំ ។
១៧). លាបប៊ឺថ្លាលើបបូរមាត់ មុននឹងចូលគេងដើម្បីឱ្យបបូរមាត់ឡើងពណ៌ផ្កាឈូក និងទន់រលោងដូចទារក ។
១៨). ខាត់បបូរមាត់ដោលលាបជែលVaseline ហើយប្រើច្រាសដុសធ្មេញដុសថ្នមៗ ។
១៩). ប្រើដៃខ្មៅគូរភ្នែកពណ៌សគូសរង្វង់ភ្នែក នោះភ្នែកនឹងមើលទៅថ្លា និងស្រស់ស្រាយជាងធម្មតា ។
២០). ប្រើគ្រីមត្រជាក់សម្រាប់ជូតគ្រឿងសម្អាងចេញពីផ្ទៃមុខ ជាពិសេសសម្រាប់អ្នកមានស្បែកស្ងួត ។
២១). កោររោមជើងបន្ទាប់ពីងូតទឹករួច ព្រោះវិធីនេះអាចជួយការពារកុំឱ្យមានរោមដុះក្រោមស្បែក ។
២២). កុំប្រើផលិតផលមានជាតិអាល់កុលលើស្បែកខ្លួន និងស្បែកមុខ ប្រសិនបើអ្នកមានស្បែកប្រភេទខ្លាញ់ ។
២៣). សម្រាប់នារីអាស៊ាន គួរប្រើខ្មៅដៃគូរភ្នែកពណ៌សូកូឡាសម្រាប់គូសចិញ្ចើម ជាជាងប្រើពណ៌ខ្មៅ ព្រោះពណ៌នេះជួយឱ្យរង្វង់ភ្នែកពន្លេចចេញនូវសម្រស់ធម្មជាតិ និងស្រទន់ ។
២៤). លាបម៉ាស្ការ៉ាទាំងលើរោមភ្នែកខាងក្រោម និងខាងលើ ដើម្បីឱ្យភ្នែកមើលទៅធំស្អាត ។
២៥). ដើម្បីរក្សាគ្រឿងសម្អាងឱ្យជាប់បានយូរ គួរម៉ាស្សាមុខដោយប្រើដុំទឹកកកតូចៗ មុននឹងលាបមុខ ។
២៦). ប្រសិនបើអ្នកមានប្រភេទស្បែកធម្មតា គួរជ្រើសរើសប្រើផលិតផលដែលមានគ្រឿងផ្សំពីអាស៊ីតអាល់ហ្វាអ៊ីដ្រូស៊ីល (Alpha Hydroxyl Acid) ។
២៧). បំបាត់ស្នាមខ្មៅលើកែងដៃដោយយកចំណិតក្រូចឆ្មារត្រដុសមុននឹងងូតទឹក ។
២៨). ទទួលទានថ្នាំបំប៉នសុខភាព ដែលមានជាតិរ៉ែសំខាន់ គឺស័ង្កសី ដែក និងប៊ីយ៉ូទីន (Briotin) ។
២៩). លាបស៊ុតសលើផ្ទៃមុខ ម៉ាស្សាប្រមាណ ២នាទី ហើយទុកចោល ១៥នាទី សឹមលាងចេញដោយប្រើទឹកក្តៅឧណ្ហៗ ។ គួរធ្វើ១ដងក្នុងមួយសប្តាហ៍ ដើម្បីឱ្យរន្ធញើសរួមតូច និងស្បែកមុខឡើងតឹងណែន ។
៣០). ប្រើថ្នាំបន្តក់ភ្នែកលាបលើគ្រាប់មុន មុននឹងចូលគេង ។ វិធីនេះអាចកាត់បន្ថយអាការក្រហម និងរលាកបានមួយកម្រិត ។
និយាយរួមមក គន្លឹះក្នុងការថែរក្សាសម្រស់ខាងលើពិតជាមិនអាចធ្វើបានគ្រប់ចំណុចនោះទេ ដូចនេះ អ្នកអាចជ្រើសរើសតាមចំណូលចិត្ត និងភាពស័ក្តិសមនឹងពេលវេលា ក៏ដូចជាប្រភេទស្បែកមុខដែលអ្នកអាចធ្វើទៅបាន ៕ លក្ខិណា
0 comments:
Post a Comment